胡美儀和老公毛俊輝拍住拖推動劇藝怕有拗撬：希望唔好迫我咁緊

「戲劇教父」毛俊輝和太太胡美儀今日（13/5）現身長沙灣出席《賽馬會毛俊輝劇藝研創會計劃》啟動儀式。毛俊輝透露這個計劃為期三年，並且會透過計劃培訓出新一代全方位粵劇人才的同時，展現出與時代接軌。而身旁的太太胡美儀笑指被老公拉埋落水參與其中：「有一日佢無端端望住我，話想邀請我加入佢嘅計劃。仲話我讀心理輔導咁叻，可唔可以幫手喺編劇嗰度做少少嘢。我見佢係我老公，咁唯有應邀啦。」

被問到有否薪水？胡美儀哈哈大笑望住老公問：「係喎！有冇人工呀？」老公毛俊輝笑說：「少少啦，哈哈！」再被問及兩公婆合作會否多拗撬？胡美儀笑言：「之前就冇嘅。就好似之前我哋喺出面餐廳傾舞台劇嘅時候，傾完之後，冇嘢傾就會起身返屋企。但呢個計劃要3年咁耐，仲要係劇本之初，咁所以我要成日問佢，咁希望佢唔覺得我煩，同埋唔好迫得我咁緊，哈哈！不過我知道戲曲係佢嘅初戀情人，咁所以有3年佢可以公開拍拖，咁我諗佢係好開心。（佢會唔冷落咗你！）咁所以佢夾硬拉埋我落水，同時間一齊拍拖。」